Toward the phonetic description of Faroese vowels

Abstract

Ljóðeyðkennini hjá føroyskum sjálvljóðum eru vandaliga skrásett av J. C. Svabo, Jakob Jakobsen og øðrum frøðimonnum. Kortini er nógv enn ógjørt viðvíkjandi lýsingini av ljóðvirðunum hjá teim ymsu ljóðunum og í samtíðarkanningini av ljóðskipanini. Høvundurin heldur, at høvuðsspurningurin er skyldskapurin millum long og stutt sjálvljóð.

Eingin serstøk ljóðskipanarloysn er av longdarmunarspurninginum, og ljóðliga er enn ógreitt, hvørt stuttu sjálvljóðini eru lin ella bert ein lítlan mun meira opin enn longu sjálvljóðini, sum tey eru samfeld við, og hvørt øll long sjálvljóð eiga at verða mett sum gliðljóð til tað í ljóðvirði.

Høvundurin hevur gjørt nakrar fyribils, ljómligar ljóðvirðiskanningar av sjálvljóðunum, sum tey verða borin fram miðskeiðis í
Føroyum. Sannroyndin viðvíkjandi longum sjálvljóðum mótvegis stuttum, sum fyri ein part er løgd fram í greinini, fær ein at ætla, at ógvuliga stórur líkskapur er millum stuttu sjálvljóðini og fyrsta partin av longu sjálvljóðunum, sum hoyra til næsta stigið í ljóðskipanini (t. d. stutt i og langt e, stutt e og langt a). Eingin ivi kann heldur vera um, at málið hevur lyndi til tvíljóðing av teimum ikki-trongu, longu sjálvljóðunum (tað sæst á spektrogrommunum). Hini »reinu« tvíljóðini (ú, ý o. s. fr.) eru ikki viðgjørd í hesi grein.